【轮证赢家】恒指「三角形」等爆
2020-06-13

    【轮证赢家】恒指「三角形」等爆放大图片

噚日见到一堆濠赌股受尽大市下行同行业数据唔理想影响,成个板块都见红,于是就拣咗佢哋大佬银娱(00027)出嚟睇,最后再拣只银娱熊(52191)谂住博一博。

喺噚日下昼大约1点15分,银娱5分钟图上嘅SlowSTC(14,3)终于都由超卖上返去超买水平,仲要喺呢个高位打横行至2点25分,按呢段时间银娱熊(52191)高低位做过$0.087/$0.084,平均买入价就係$0.0855。

去到噚日3点钟前,再睇返银娱5分钟图,见到SlowSTC(14,3)下行中,但价就好似无乜点郁,而(52191)依家证价做紧$0.086,就试吓再等多一阵,但大前题就係有咩异动嘅话(52191)都要即走;最后去到3点10分,见SlowSTC(14,3)止步回升,望望个钟得返一个钟都无就收市,都等唔到SlowSTC(14,3)再落返去超卖位,(52191)喺3点15分到见仲有$0.084就放弃,对比起平均买入价,叫做无咗1.5格兼手续费,条气係唔多顺架,今朝U盘时一度见只银娱见红,兼且恒指开市呈跌就更架唔顺;但到依家10点6分,恒指升77点,做紧25703点,而银娱就跑赢大市,喺10点9分升紧1.54%,条气即刻顺晒。

都係睇返大市算,日线图见恒指目前仍处于「三角形」位置,而噚日就处于「三角形」底部兼呈「十字星」,呢粒「十字星」坦白讲喺呢个时候又唔係话好有用,事关喺「十字星」出现之前大市都係横行,就算「十字星」出现嘅第二日(即係今日)恒指都係横行,前前后后都无转势嘅轨迹。

再者,噚日都开埋条保历加通道出嚟睇,见保历加通道口收窄就知大市未来嘅波幅都会开始收细,配合埋恒指现处于「三角形」尖尖位嚟讲,成件事又合理喎。再睇埋恒指皮幅指数(VHSI),自7月22日开始VHSI就弹咗上20天线并沿保历加上升通道运行,目前水平为23.04,数值上不算低,不过位置上处于保历加上升通道里面且贴近中轴水平,算係上升通道嘅底部,而SlowSTC(14,3)就处于中轴位置,或者会再落多一日先再见反弹。如是者,又即係话个市有机会吽多一日先至会出现一个比较大嘅波幅走势;再又即係话「三角形」待爆即将上演。

再睇埋恒指牛熊证街货图,依家10点26分,恒指最低见过25498点,以2点杀尽25500至25599点嘅牛证第一层街货,呢度有相当于196张期指;再落25400至25499点呢度就有72张期指。至于重区就仍然喺25200至25299点,呢度有相当于852张期指。

至于上方熊证,最贴价嘅係25700至25799点,按依家10点29分计,恒指最高做过25736点,即係话呢一层嘅贴价熊有部份係被大市杀死咗,而呢一层全层有69张期指,向上数多两层都只係分别有111同69张期指,讲紧上到去26000至26099点嘅街货先叫做有啲睇头,呢一层有相当于712张期指;而重货区就係26300至26399点,呢度有相当于798张期指。

既然两边都有新增街货层出现,又重新计一计牛熊街货中间位,即係(25700+25499)/2=25599.5,依家10点32分,恒指做紧25632点,同中间位争32.5点,係比较贴近上方嘅;但又公平啲咁讲,依家牛熊街货相差嘅距离得200点鬆啲,现价会好容由近牛移过去近熊,咁就更加反映到个市处于中间位,无稜两可,等爆味道更重。

休战一日,等睇听日个街货图有无启示好过。

作者阿珊,任财经/投资版传媒人十几年,《钟摆战略赢港股》作者。用技术分析专心玩轮证,唔贪心,志在搵餐下午茶。

电邮:[email protected];FB:轮证赢家


上一篇: 下一篇:

相关推荐